الفرامل عليها تتوقف سلامة قائد الموتوسيكل

كيف تقود الموتوسيكل في مصر  ؟ 

ازاى تركب موتوسيكلات في الزحمة ؟

تُعد حوادث الموتوسيكلات فى مصر من أخطر أنواع حوادث الطرق، بسبب تأثيرها المباشر على أجساد ركابها.  

الموتوسيكلات معروفة بالخطورة , ويمكن مفيش واحد متعرضش انه يعمل حادثة او عمل حادثة فعلا . واكيد كلنا تعرضنا لمواقف صعبة تنيجة الفوضى العارمة والزحمة و عدم التنظيم فى المرور و بعض السلوكيات الى الكل عارفها من بعض الناس , و فى ناس  بطلت تركب موتوسيكلات و ناس  الله يرحمها و ناس ربك سترها معاهم و بتحاول تحترس الى اقصى حد عشان انتو عارفين ركوب الموسيكلات ده ادمان
الكلام  للناس الى بتحب تركب موتوسيكلات سواء للمتعة او لظروف العمل , يعنى الموضوع لكل الناس الى عنده موسيكل ب200 الف او حتى 8 الاف و ياريت كل الناس تستفاد .ان شاء الله.
اول شئ هنتكلم عليه اساليب القيادة السليمة و  هانبدا باستخدام الفرامل و خصوصا الفرامل المفاجئة فيه نقطتين   بخصوص عوامل الامان و السلامة
1-  الناس الى بتركب الموتوسيكلات للمتعة هم اكتر الناس التزاما بالسيفتى جير , اما الناس الى شغلها قايم على الموتوسيكل هم للاسف اكتر الناس مش ملتزمة بالكلام دة ،و الغريب ان لو سالت اى واحد فيهم ممكن يقولك تاريخ طويل من المواقف الى كان ممكن يموت فيها و برده مفيش فايدة .
2- العائلات الى بتبقى راكبه كلها على موتوسيكل واحد , يعنى الاب و الام و 2 او 3 عيال , دة بصراحة حاجة مش معقولة , لو الكلام دة فى اى دولة محترمة الراجل دة يتسجن ,
احنا عارفين ان الحالة الاقتصادية زى الزفت و المواصلات غالية , و فى ناس مش معاها , بس برضة دى موش مبرر ,وما اكثر الحوادث بسبب عائلة كلها راكب الموتوسيكل ، ولذلك تستقبل أقسام الطوارئ بالمستشفيات العامة يومياً عشرات الحالات المصابة فى حوادث الموتوسيكلات التى تزيد بشكل لافت مع العائلات الى راكبه كلها . عشان كده فياريت الناس تاخد بالها عشانك انت وعشان اسرتك ولو مش خايف على نفسك خاف على اسرتك عشان هما محتاجينلك اكيد .

                                                 ازاى تركب موتوسيكلات في الزحمة ؟

- الفرامل :  🚦

الفرامل عليها تتوقف سلامة قائد الموتوسيكل

هناك 3 انواع من الفرامل :
1- الفرامل الامامية .
2- الفرامل الخلفية.
3- فرملة الجيربوكس او الموتور
- اول قاعدة في استخدام الفرامل انك ما تكبس جامد لان معظم الموتوسيكلات ما فيهاش abs عشان كدة لو كبست فرامل جامد البايك هايزحف .
- المفروض ان الفرامل الاساسية في البايك هى الفرامل الامامية عشان الوزن بيتنقل بفعل القصور الذاتى عند استخدام الفرامل و عشان كدة قطر الديسك الامامى اكبر من الخلفى لو كانت دسيك او حتى طنبورة بس مش معنى كدة انها لوحدها لازم تكون مع الخلفية, المفهوم عندنا فى مصر العكس ان الامامية لو استعملتها هاتتقلب و لذلك التركيز كله على الخلفية و ده ان شاء الله هوضحه بعدين .
- فرملة الموتور هى بساطة ان تشيل ايدك من البنزين و انت مدى غيار الى هايحصل ان المكنة هاتهدى لو انت عايز تزودها تسقط غيار يعنى لو على 4 تجيب ال3 .
- طيب ازاي استخدمهم , هل كلهم و الا غلط ؟ و ايه علاقة الاحتكاك و الوزن و الكاوتش و الملفات ؟
و ايه هى اقل مسافة توقف مع معدل السرعة ؟
قبل ما اكمل احب اعرف الناس عاجبها الموضوع و عايزنى اكمل و لا اية؟

الفرامل و الاحتكاك :

- كل ما يزيد الاحتكاك كل ما زادت قوة الفرامل يعنى لازم تتاكد من كل الاتى :
- الكاوتش : لازم تتاكد من حالة النقشة و البروز بتاعها و هل هى مناسبة للطريق و لا لا .
- تيل الفرامل : لازم تتاكد حالتة كويس و الا عايز يتغير .
- سطح الدسيك و هل خشن و لا ناعم و هل في بروز او متاكل .
- الطنبورة و التيل الخلفى لو عندك لازم تشوف الطنبورة من الداخل متاكلة و حالتها ايه .

الفرامل و المساعدين :

كل ما كانت حالت المساعدين و خصوصا الامامية كويسة زاد التحكم في البايك و انت دايس فرامل و العكس صحيح ضغط الهواء للكاوتش و الفرامل كل ما زاد ضغط الكواتش عن المعدل المظبوت قل الجزء الملامس من الكاوتش للارض و بالتالى قلت الفرملة و فرصة الزحف زادت ، و لو قلت برضة مشكلة كبيرة عشان كاوتش الموتوسيكل هيبقى مسطح و لكنه المفروض ياخد شكل حرف u و فى الحالة ده هيبقة كارثة فى الميل و الملفات ، كل بايك المفروض ان له معدل للضط الهواء للكاوتش لو عندك كاتالوج ممكن تعرفة او ممكن تعرفة من الارقام الموجودة على الكاوتش نفسة .

الوزن و الفرامل : 🚲

- المفهوم الى عندنا الى كل ما كان البايك اتقل كل ما يقف اسرع , و لكن الصح هو العكس فلو انت مركب واحد وراك هتحتاج تدوس فرامل اكتر من المعتاد و انت لوحدك .

الزحفة و الفرامل : 🚲

- لو كبست فرامل حتى لو على سرعة بسيطه لازم البايك يزحف و طبعا عندا مفيش شارع مفهوش تراب و لا مياه و زيت و طبعا هاتبقي مشكله
- الفرامل الاماية لو كبستها هاتزحف لحظات لحد ما تقع
- الفرامل الخلفية لو كبستها هاتزحف اكتر بكتير, لو انت محترف ممكن تزحف منك و لكنك ممكن تسيطر عليها ان تمشي في خط مستقيم و تحمل جسمك لوراه لحد ما تقف , اما لو انت عادى هاتزحف يمين او شمال على حسب وضع جسمك ساعتها و ممكن تعدى العجلة الامامية وانت تطير بالجنب

طيب كل دة جميل افرمل ازاي ، الفرامل العادية مش المفاجئة

1- مور البايك و او امسك دبرياج
2- ابدا بالفرامل الخلفية دوسة خفيفة
3- ابدا اضغض على الفرامل الامامية مع الخلفية سنة سنة لحد ما تقف ,لو حسيت ان انك عايز تقف اسرع اضغط الاتنين ببطء و اوعى تكبس زى ما قولنا قبل كدة و خالى بالك اللحظة الى هاتبدا تشيل رجلك الشمال و تنزل على الارض هى المفروض انك تكون خلاص وقفت تماما

الفرامل المفاجئة :

قبل ما نتكلم عن الموضوع دة لازم نعرف حاجة مهمة جدا , هى ان فرامل الموتوسيكل غير فرامل العربية خالص , و مسافة التوقف اعلى بكتير عشان ما تنفعش نكبس فرامل على الاخر زي العربية . و طبعا اغلب الفرامل الى موجودة ما فيهاش ABS الا قليل جدا
و الحاجة التانية ان انت لازم تاخد اجزاء من الثانية للتفكير هل تحاول تقف او تحاول تعدي او هتعمل ايه بالظبط , و الكلام في اعتبارات كتيرة يعنى وزن و نوع البايك و وزن الراكب و نوع الكاوتش و الاسفت جاف تماما يعنى الارقام دى مش قرإن, بس ممكن تتدينا فكرة كويسة .
طيب لو خدنا مثال على سرعة 60 ميل الى هى 100 كم\س هنلاقى ان وقت التفكير الى هو اجزاء من الثانية مع السرعة دى بيعمل 18 م و مسافة التوقف ما بعد القرار 55 م يبقى اجمالى 73م الى هى لو فى صف عربيات راكن جنبك يبقى حوالى 18 عربية
طيب لو فى ABS المسافة طبعا هتقل
(ملحوظة مهمة جدا : ABS هي فرامل منع انغلاق , في العربية بيزيد من مسافة التوقف مش بيقلها انما في البايك عشان الراكب خايف من الانغلاق فبيسيب شوية ضغط على الفرامل كان ممكن يستفيد بيها
وهنا تيجى خبرة البايكر .)
نرجع للمثال :
طيب انت لقيت المسافة اقل من الكلام ده يعنى انت ماشي و لقيت واحد خد ملف قدامك بسرعة والمسافة بينكو حوالى 50 م , ايه الحل؟
لازم تعرف انك عمرك ما هاتقف , ولازم تفكيرك يروح ازاي تهدي وتحاول تفاديه , او تقلل بس من قوة الصدمة لا قدر الله.
طيب نفترض انك كنت ماشي فى نفس المثال بس على سرعة 70 كم\س , طيب كدة نظريا ممكن تلحق تقف,
طيب نعملها ازاى عملى
خلاص انت فكرت و خدت القرار
1- اعدل البايك تمام و امشي في خط مستقيم
2- سيب بنزين تماما و اضغط على الفرامل الخلفية شوية مش كتير و فى نفس الوقت اضعط على الفرامل الامامية اكتر من الدوسة بتاعة الخلفية ( لان الفرامل الامامية هى الاساسية فى البايك )
3- سقط نقلة يعنى لو انت على الرابع هات تالت و بعدين هات التانى (بس ايدك تبقى سرعة جدا على الدبرياج )ليه ؟ عشان اللحظات الى هدوس فيها دبرياج هتفقد فيها مساعدة فرملة الموتور على العجلة الخلفية
و اهم حاجة فى الحوارات دى السنس , يعنى لو حسيت ان الفرامل قفلت خفف الضغط على الفرامل
طبعا الخبرة مطلوبة في الكلام , لو انت بتركب كويسة انت هاتبقى متبرمج كدة اوتوماتيك و هتلاقيك بتستخدم جسمك كويس للتوازن
طيب الكلام دة جميل بس هل هو سهل ؟
الاجابة . لا, محتاج ممارسة و خبرة و تجربة في مكان فاضي على مختلف انواع الارض الاسفلت , التراب , المياه , الزيت

عشان كدة حبيت اقول شوية نصايح انا شايف انها مهمة جدا : 👍💓💓

1- خلى بالك السرعة ثم السرعة 100 مرة 🚀
2- دايما سيب مسافة كويسة بينك و بين الى قدامك . 🚘
3- توقع دايما اخطاء الاخرين . 🚴
4- خليك دايما عارف انت ماشي على كام من غير ما تبص على العداد كتير ( دى بالممارسة ) و دى هاتفيد عشان تققل وقت التفكير الى احنا قولنا عليه
5- خليك دايما ماشي على اليمين , بس لو انت ماشي و في صف عربيات راكن خلى بالك ممكن تلاقى باب اتفتح في وشك فى لحظة , فخلى بالك و امشي براحة
6- حاول تحفظ الطريق كويس ( العالم كله بيعرف الشوارع و الطرق بس , لازم تعرف البلاعات و الحفر و المطبات و التراب بالاضافة للشوارع و الطرق )

حاول تدرب نفسك على لحظة ما قبل الانعلاق 

***********************

***********************